煮飯，原來唔簡單。
以前放學每日返屋企都會等阿媽煮飯，每日如是，亦如此應份，如此奉旨。
三餸一湯。
望到自己喜歡嘅餸固然開心，但亦都好Expected，但永遠都有一兩樣係自己唔想食嘅，會同阿媽投訴唔好再煮，又或者直接掂都唔掂。
有個笑話，每個仔女都曾經經歷過，就係連續一星期食同一款餸，只因你唔小心講咗句鐘意食。
當時會諗，鐘意食都唔係日日食啦……可唔可以俾少少心機，俾少少新意，俾少少熱誠。
今日，自己住，望住個廚房……唔……煮個麵算喇……加多條腸仔有時都懶。
你會發現，三餸一湯係幾咁難搞。
當幾個家常菜，蕃茄蛋，蒸馬蹄章魚肉餅，炒個蜆，再一個青紅蘿蔔豬展湯。
首先，你要去買食材，蕃茄、蛋、豬肉、馬蹄、章魚、蜆、青紅蘿蔔、豬展等等，仲未計有時要用嘅調味料、油鹽。
有錢當然可以係超市一次過買晒，但以我記憶阿媽係個會格到盡嘅人，分分鐘連青紅蘿蔔都會分開兩檔買，如果你對食材有要求，仲可能要行幾個檔口比較吓。
買完之後，你係咪住街市樓上？唔係的話你就要拎住成幾公斤嘅野行返去，有時你會諗，唔怪得之師奶個個拉車仔，日日買的話真係人都死。
買完返去，你要準備食材，洗野、切野、丟野等等，然後要計好時間幾時開始煮，幾時煮完剛剛好，凍咗就唔好食。
有次煮咗餐九大簋俾老婆食，我足足花咗半日去準備，滿心歡喜地等佢表揚自己，點知……
佢返到嚟第一句就彈凍咗，喂，你自己遲返關我q事？
第二句就話賣相唔好，第三句就話呢樣自己唔太喜歡食！十五分鐘之後，佢食完，然後就睇電視，我心諗，我嘅讚美去咗邊？
突然佢叫一叫我，機會嚟喇飛雲，我笑住咁轉身，然後聽到句：「記得洗碗啊！」
我拎住隻碟，聽到一個碎咗嘅聲音，唔係跌咗隻碟，而係我個心碎咗啊！
望住餘下嘅餸，我默默地食晒佢，一番心血，唔食晒佢對唔住自己，亦諗起阿媽永遠係守尾門嘅感覺……
洗完個碗，我發現原來一向奉旨嘅野係幾咁難能可貴，日日如是的話係幾考驗耐性，加上我呢個仆街仔彈呢樣彈個樣，食完就返入房打機。
其實煮都唔算難，熟能生巧，最難係諗食乜，屋企咁多人，順得哥情失嫂意，同時要考慮價錢、路程、煮法、之前煮過未、自己識唔識等等，同時你仲要諗自己口味同其他人唔同，咁當然係煮自己食嘅野優先啦。
我心諗，鐘意啊嘛，咁煮多幾次諗少樣，將心比己，我都會。
以前，同學一齊放學搵地方玩同食飯，如果要返屋企食，會覺得好掃興；但自己住之後，有咁上下年紀，返屋企食就變得好重要，要約約第二日，今日我要返屋企食飯。
煮飯，從來都唔簡單。
只係，你諗野諗得太簡單。
Search